Posted by Racko on February 9, 2012, 6:59:02
Biar panjaha deng tukang bafeto oom Fred ternyata polia panako skali,apalei waktu dulu dia maso rumasaki.
Waktu itu oom Fred mo operasi lidah maar dia tako kalu tasalah operasi kamari kong mo jadi apa lei deng dia,
depe dolong hati kalu dokter iris tasalah kong tu lidah nda bisa tasambung jadi wowo sudah kitya,
lebe ciloko lei kalu tu dokter hela tu lidah kase kaluar kong jadi lidah buaya sudah nyaku,
ini yang beking oom Fred tako polia luwar biyasa punya.
Dua hari oom Fred cuma babadiang duduk melongo rupa burung sampe tu dokter mo operasi datang dia takage..
Dokter ; Selamat siang oom Fred ?? kiapa kwa pucat dan diam saja oom ? biasa biasa saja oom nda usah tako.
Oom Fred ; Eh dokter,..Sapa kwa nda tako mo operasi lidah,apalei baru kali ini kita mo operasi.
Dokter ; Oh..itu soal kecil oom ,nda usah tako,
Oom Fred ; Ado eh dokter operasi bae bae jo dang jang beking kita tambah tako.
Dokter ; Ah Oom ??? pertama kali mo operasi saja oom so tako ,kong kita yang baru kali ini mo operasi orang kita nda tako.
Message Thread
« Back to index